南瓜成長手記

今天同阿仔做了一樣我唔係咁想做既事 - 領洗 始終阿仔除了係我個仔之外, 仲係我老婆個仔, 我說服不到她, 便唯有接受. 受洗既原因很簡單, 就是為了日後報校果5 分宗教分, 連之前既 briefing 時, 神父也說就算你黎領洗既原因係為5 分, 也不緊要, 最重要係個結果. 但如果比我揀, 我寧願唔要呢5 分, 亦都唔想違背我既諗法. 我本身是無宗教信用仰, 只是老婆係天主教.  對宗教本身我無咩意見, 可能真係有神, 亦都可能係無神, 你信就有, 唔信就無.  而我又唔係唔信有神, 但 呢D 唔係人類認知範圍既野, prove 唔到有定無.  雖然由小到大都係讀基督教學校, 但始終感動不到 但對宗教團體呢, 我就有D 反感.  如果真係有神, 點解同拜一個神, 都可以有唔同既宗教組織?  好似天主教同基督教, 咪又係信主耶和華, 而基督教更有好多唔同既分枝, 甚至係同一個宗教團體, 佢裏面唔同既教會都會有自己一套規矩.  又好似回教, 都有分遜尼, 什葉咁.  說穿了, 其實咪又係政權以外另一種權力利益集團去統治人. 睇返每個宗教組織, 都有好多黑暗既野.  最明顯係天主教, 遠既唔講, 近既好似孌童癖呢D 咁, 做得牧師神父呢D, 唔係應該比平民更接近神, 更應該比其他人明白神既教誨, 更有力量去遠離魔鬼既誘惑?  但事實卻好似相反; 另外依家又接受大陸既愛國會.  為左可以擴展自己既版圖, 可以去到幾盡?  人都係神創造, 但天主教都可以接受先愛國後愛神? 所以要阿仔去領洗, 我覺得自己好似推阿仔入黑社會咁.  為左呢5 分, 我好似放棄了自己既一些底線.  老婆會覺得呢D 無傷大雅, 但我覺得作為父母唔係應該要身教既咩?  無呢5 分, 又唔係無書讀, 但我地咁做, 係咪即係教阿仔做人只要有利益, 咩底線都可以放低?

早三,四個月果陣, 南瓜BB 已經識得BU口水, 不過果時只係BU左一段短時間便停了; 點知近排佢又無端端開始BU返口水, 而且今次BU得比較頻密同勁. 暫時未留意到佢會因乜原因BU口水, 有時悶佢又會BU, 玩玩下又會BU, 出街見到人又BU.  依家仲細個, BU口水都可能會比人覺得係得意, 但大啲既話就會比人覺得係無禮貌, 至少我係咁覺得. 上網睇FORUM, 好多人都話唔駛STOP佢, 大大下會停, BU口水係成長過程既一部分, 話STOP佢仲可能會妨礙BB既發展.  但作為家長, 始終都有啲擔心佢習慣左到大左都仲繼續對住人BU口水. 依家唯有當佢BU 果時, 叫佢唔好, 話比佢知咁係無禮貌, 不過真係唔知佢會明幾多.  出到街果陣如果佢BU口水, 又會搵埋隻手擋一擋驚佢BU到人.  但佢開始識得推開我隻手.... 教小朋友真係唔係一件易事, 不過呢個應該只係個開始 

前幾天, 見到小可仁離開既新聞, 心有些噏. 睇到新聞裏他側身睡既樣, 睇到內文說他怎樣流血不止, 但有野食果陣又會笑, 最後小可仁係佢爸爸懷裡離開... 真係睇到有D 眼濕濕.  可能因為自己都係個爸爸吧, 希望其他還有呢個病既小朋友, 可以救得返 回想起來, 由知道老婆有左, 經歷九個幾月, 到BB出世, 甚至到之後可以抱起佢果刻, 我對自己成為爸爸呢個角色, 一直都感到很虛無飄渺, 好唔實在.  直到要開始幫手照顧他, 沖涼, 抱他訓, 換片, 飲下茶, 等等, 慢慢經歷過呢D野之後, 到依家九個月了, 終於好實實在在咁覺得自己係一個爸爸. 以前睇人地既BLOG, 話BB笑係對自己既最大禮物, 果時唔多明, 但依家就好明白. 特別係當自己能弄到他笑出聲, 大笑, 呢下自己真係好開心, 好有成功感.  睇到佢既成長, 學識一D古靈精怪既動作, 都覺得好開心, 甚至係見到佢喊, 扭計, 都覺得好有趣. 自己看自己既BB, 永遠都係覺得佢係最好, 最得意.